Pakulat

Oga-ogaw nin tuloy, agto balet apukpukan
So sabo na dala tan say kagantilan
Baleg ya sakit tan irap kasumpal na siyam bulan
Inatey lawarid inpananak, say tetel ag nasabaan.

Namemeneng, agto amta no anto so alooban
Irap tan problemad bilay, sikato 'yay katuaan,
Abaluan to "bangungot" labat ya naandid kaimbuasan
Manliplimatan mankukugip, pakalikna toy lanang.

Angkekelag ya gamet diad tamoro akapeket
Sangi-sangin singa sibong manaanap na underet;
Dilat-dilat kalamor, manpirawat ya makapangan
Soso'y inan katorse anyos, pakulat ni, anggapo'y iyan!

Anto Ni Arum?

Kinmalmay liknaan kod balikas mon agamuran
Amtak anggapod vokabularyom salitan babarungan
Aralem so pakatalos mo, tanday tuan panangaro,
Anggan masabit so dalan, bataken moy peligro.


Tetepeten mo no akin et amuti so lupak,
Akanengneng ak na anyanyi; agi! atak-takotak!
Agla pankelawan mangiwgiw pati seklak
Agak makagalaw, binmegas so gana-ganak!


Tawagen taka lawari pian siak so pasantigwa
Amtak walay pakayarim ta inaponan ka manaya;
"Gala! Gala!" kuan mod ataktakot, ontonday panpetang da
Mabisay kemkem mo lalo no usaran moy lutda!


Panpirpirawatan iran kemkem, kapigan kasi nagamuran?
Maoyamon ap-aplos na larak ya impat-tang
Makaekal na taktakot tan beblay na lama-laman
Nagugo kan singa belek, labay moy untirakyang!


No sikay manambal ed siak, unabig ak ya magano
Manpat-pataw ed liket, malet so kakaugip ko;
Naakar koy lurem ya kuma-siyam, pati say kuma-samplo
Basta lanang kad diking ko, anto ni arum so anapen ko?

Tonda La 'tay Barong

Baleg ya tepel ta agak akasabi
Walay akasengeg, agka ombabarong kari
Excited ak amo nen tinmawag kad siak
Nen tepeten koy direction, agko la nangel so ebat.

Dakel ya lugar so aliber-liber ko
Amay GPS anggapoy kuwenta to
Anonotan ko imay datin ayuyang ta
Balet panon to ta alupak la may mangga.

Agmo iisipen ya inindian taka
Ta amtay Dios tan ya agko getma
I'll make it up to you, atan so promisa
Pian agka onkaro; makabawi kan siansia.

Bisitan anengneng mo ya aka-spoting
Agka mapaga ta agni akakiking
Ag taka isalat, mas guwapo kan arawi
Mas maaro ka lawas, talindeg mas mataraki!

Susto la tay sibek, tonda la tay barong
Agka la onlelespak ditan ed sukong,
Punasan mo la tay luwam, imis kay daiset
Pian say lupam onliwawa, ag asilot so kirep!

Wadia ak, Wadtan ka

Apaer so iliw tan ermen ko natan
Ed inpakabasak na insulat mon liknaan
Pati naliliknak ya beblay ed laman
Sikatoy atambal, sinmamit so panangan.


Say kuan mo wala niray pilalek mon nagamuran,
Ta anggano siak met, ontan so gegemtan
Wala niray labin itangay ko lad tawen
Amtak say mata tandua walad saksakey ya bitewen.


Anggapo lay dua-rua ya naliliknak natan
Ta akom ed siak ya wadtan kan lanang,
Kindat tan pansalita agla kaukulan
Linggis mo labat ed siak, tampol kon natalusan.


Anggan say nanbeetan ta libo-libo'n milya
Wadia ak, wadtan ka, maniba tan siansia
Masarag ni 'yay ketab ambegyan walad arawi ka
Asingsingger ka lanlamang, sangkagawat taka.


Agka la mapaga, mareen lay nonot ko
Anggapo lay gunigon ya kera'd sayan puso,
Segi sirin inaro ta ilirep kon magano
Pian agak mantemeg naani ed trabaho!

ALENLENEG

Ombebetel lay siplog na dagem
Say agew ko mabetbet ya mayemyem,
Anap-anapen taka lalo la no ngarem
Mailiwak ya naynay, say nonot ag makareen.

Akin et wala ni tagleey na puso
Anta apaneknekan mo lan matua'y panangaro?
Amin ya duaruwam komon lingwanan mo
Ta sikan-sika labat so inyutel kod puso.

Agay lay swertek ta akabiang kad bilay ko
Makatalos, maaro, tan mamon ya impanpuso
Amtak ya mainaway bilay ya arapen ko
Ta wadtan kan suporta ya lanang ed diking ko.

Samit na esaes tan puyok ya makagigi
Kugkugipen kon nanay no onsabi lay labi
Alenleneg kad bilay ko, say Dios so tasi
Magnayon kan aroen ko anggad bilay naandi.

Ompatey ed Ibeg

Pasensya'y baleg ta natan ak labat
Kabangu-bangon ko, maninat-inat;
Malet so ugip ko, agko apasikmat
Maksil ya uran, karol tan kirmat.


Baleg ya bagyo'd dia so tinmerak
Dakel so aderal, saray kiew alupak,
Tanem tan saray ayep naanor ed delap
Makapasinagem, mandenden ya irap.


Agka mapaga ed satay hayhil
Ta walay balon swekos kon asaliw
Anggan nagatinan taka agmo la nalikna
Ta agak ambelat, 100 labat ya libra.


Say dagum tan tinebey agko la kaukulan
Ta matua'y panangarom, amtak la natan
Paulian mo la ratay matan sibang-sibang,
Ompatey irad ibeg tan paninam-inam!

Imis ed Bibil

Lalon dinmenden so iliw kod sika natan
Saray sulat ko manaya agmo ni pinuolan
Bakat na apalabas, tanda na aroan
Akon mansiansia lawas agmo inkaindan.


Tampol kon binukay iray sul-sulat mo
Ta wadia met nin akasinop ed danganan ko
Sikatoy ligliwak no maletey so puso
Pepeketan kon sipan mo, ako ya maando.


Abilay so liknaan ko tan say ilalo
Linmemew so kupbang,sinmayaksak so puso
Yugip ko naanin walay imis ed bibil ko
Kankantin mas marlang nabuwas so onarap ed mundo!